ديما علم تكتب: التصيّد لرجال الشرطة

بقلم: ديما علم فراج

ممكن يصير فيه تصرف لشرطي هون أو لعسكري هون ما يعجبنا.. بس هو بالنهاية بشر؛ وفي فروق فردية بينا كلنا بمختلف وظائفنا..

الي ملاحظته؛ انه صار في ناس يتصيدوا الهم أخطاء عالرايحة والجاي ومنها أشياء مو مستاهلة.. وينزلوها عالفيسبوك أو بيكتبوا فيها لجهاتهم لغايات النشر ع الفيسبوك ويعملوها قضية رأي عام..

بصراحة؛ الموضوع أخطر بكثير مما تصوروا؛ انا شايفة انه صار في تصيد الهم بعد حادثة أو حادثتين.. وصار الشاطر الي يلاقي ربع قصة أو يخلق قصة..

كل دول العالم.. الشرطة ببعض الحالات بتتعامل بشدة شوي؛ رقيب سير وفي أزمة بالشارع بحكيلك حرك سيارتك بده يفضي أزمة سير لكل الناس.. مو فاضي يسمع أحلامك وطموحاتك..

احترام هاي المؤسسات والعاملين فيها مصلحة النا كلنا.. والمشاطرة عليهم خطيرة.. والبعض عم يتصيد اما لأسباب شخصية.. أو فكر حادثة أو حادثتين اضعفتهم وصار بده يستقوي..

مني وعلي.. الي بده يصير يتشاطر اخطر علينا من كل حدا بده يضر البلد..

هدول الي نحن بنّام مرتاحين من وراهم وبنطلّع اولادنا عالشوارع مطمئنين بوجودهم..

عيب نتصيد لهم ...وعيب نستسهل الكتابة عنهم والاستخفاف بأهمية عملهم

الحفاظ على قوتهم و هيبتهم مصلحة وطنية عليا..