البطوش يكتب: قصة كفاح طالب توجيهي

كتب: بلال نايف البطوش

١٢ رقم جلوس و١٢ محاولة لحين أن نجحت اليوم

انا بلال البطوش الي بحكي بهاي اللحظة بكل رضا وفخر الحمد لله..

الحمد لله إني بعد تعب دام سنين نجحت اليوم..

الحمد لله إني ما يأست ولا مرة حاولت فيها من جديد..

الحمد لله بقلبي الي كان مليان قناعة انو رح يجي يوم و أنجح فيه متل كل اخواني..

الحمد لله إني ما تركت الأمل يهرب مني بكل شعور حزين حسيته لكل مره فشلت فيها وحكولي مش ناجح..

صحيح انا بشتغل والله غانيني عن الشهادة،بس ما رضيت إلا اني أنجح وأكمل وتكون بإيدي شهادة اليوم أفتخر فيها شو ما كانت..

هي مش مجرد شهادة وهو مش مجرد نجاح..

بقدر احكي عن حالي إني مكافح..

وبقدر أطلع هسا قدام المراية راضي عن حالي..

بقدر أحكي إني بلحظة نجاحي هاي صرت بآمن بإنه ورا كل جبل كبير فيه سهل والجبل أنا شلته وشوفت السهل

بس والله ما كان بسهولة..

النجاح الي وصلتوا اليوم أخد من روحي ومن تفكيري ومن حياتي..

صحيح إني مش دريس..

وصحيح انه بطل إلي مزاج ع الدراسة من زماااااان...

بس كنت بدي انجح عشان اهلي اولاً..

بعدين عشان كل حد بحبني..

ونهاية الحكي...

لا تتركوا مجال لليأس بحياتكم..

طول ما جواتكم نفس وروح إنتو قادريين توصلوا للنقطة وللهدف..