بقلم: معتز احمد بصبوص
اول شيء بدي احكي على مستوى بيتنا المتواضع
نكون بالبيت سبعة اشخاص وتنقطع الكهرباء
بقوم انا لحتى اعرف سبب الانقطاع هل هو عالحي كامل او ماس كهربائي او علينا فواتير والشركة فصلتها او حادث تدهور سيارة وضربت العامود المغذي لبيتنا او للحي او او او
هون انا اذا كنت سريع ونشيط وفاهم اقل شي بدي عشر دقائق لحتى اعرف سبب القطع وارجع ابلغ السبع اشخاص اللي معي عن السبب
بالوقت هاظ اهلي يبلشوا تحليل منهم الذكي اللي يفتح على جوجل ويكتب (سبب انقطاع الكهرباء عن بيتنا) يطلعله الف خبر فهو ينقي واحد ممكن يكون "تدهور مركبة سبب انقطاع الكهرباء واصابات ووفاة بالحادث" ومنهم خبير عالتوالي ومنهم خبير عالتوازي عالتوالي يقول قطعت فجأة معناته تماس كهربائي وخبير عالتوازي يقول قطعت شوي شوي معناته حادث سير ومنهم اللي دايما يعمل فتنة فيسأل بكهن ( معتز دفع الفاتورة اللي ابوي اعطاه يدفعها؟؟) ومنهم ابو بصلة محروقة بقضيها يشتم ويصرخ علي ليش تأخرت
وكل واحد منهم يحلل سبب الانقطاع من عنده وممكن ينشر سبب من مخيلته واصلآ ما حدا منهم يقدر يصرح ويعلل سبب الانقطاع غير لما اعرف انا واجي واخبرهم طبعآ كله بغضون عشر دقائق زي ما ذكرت سابقآ
وبس اعرف السبب واخبرهم اكيد في المشككين بخبري حتى لو كان صح وبظل مقتنع انه هو صح وانا مرتكب مؤامرة ويشكك بخبري...
خلصنا من بيتنا ننتقل لشي ثاني مشابه
انفجار مستودع الذخيرة القديمة قيد التفكيك في الزرقاء..
بعد ثواني قليلة من حدوث الانفجار ونشر الصور والفيديو من الناس بلشت مواقع التواصل الاجتماعي تعج بمنشورات عن الخبر ومنهم زي عائلتي
الذكي اللي بحث على جوجل ووجد خبر قديم من 2019 ومفاده ثلاث وفيات واصابات (تخيل كم اردني عنده ابن.. اخ.. اب.. زوج.. عسكري دوامه بالغباوي او خو)
ومنهم الخبراء العسكريين (الانفجار بلش من تحت لفوق معناته صاروخ نزل علينا من اسكوتلندا)
او الخبير الثاني (الانفجار كان بالعرض معناته قصف مدفعي من خورفكان)
ومنهم ابو الفتنة (هو الخلية الارهابيه مسكوها؟)
وفي ابو بصلة محروقة بلش سب وشتم ليش الدولة تأخرت بالبيان وليش للان ما حكولنا شوفي
واصلا الانفجارات لسى شغالة والدفاع المدني لسى ماوصل والاجهزة الامنية والعسكرية بالطريق وهم ماعرفوا ايش في وشو اللي صار
طبعا كل هالشي صار بعد ثواني من انتشار الفيديو
وعندك المشككين حتى بعد ماطلع بيان عسكري مش مصدق واعتبرها مؤامرة عليه وعلى الوطن وللان مش مصدق غير قناعاته.....
ياريت نتحلى بالصبر والهدوء لحين بيان سبب اي حادث على مستوى البيت، الحي، المدينة، الدولة ونفهم شو اللي صار من لسان صاحب العلاقة وذوي الاختصاص وما نكون لا الذكي ابو جوجل والاشاعات ولا الفتان ولا الخبراء ولا ابو بصلة محروقة ولا المشكك ونصبر
بالنهاية اشكر كل واحد انتظر البيان الرسمي وكانت كتاباته دعاء بالخير للوطن وابنائه او كان نايم
