مروان جمعة يرد على الاتهامات: ما بسمح لأحد ان يخوّن ويشوه سمعتي

أنا عادة ما بجاوب اتهامات البعض على مواقع التواصل وخاصةً لم يتم اجتزاء الخبر او المقابلة مثل ما صار اليوم ولكن خليني اوضح.

نعم بأكد مرة ثانية لما درست في امريكا في منتصف الثمانينات لما كانوا يسألوني من وين انت واجاوب الاردن كانت ردة الفعل تكون غالبا الصمت او "وين يعني" فكنت اشرح وفقط لما اذكر المغفور له جلالة الملك حسين كان البعض يفهم. الأمريكان بطبعهم ما يهمهم ولا يعينهم اي شي خارج ولايتهم إلا إذا بأثر عليهم ووقتها وقبل الإنترنت وانفتاح الإعلام فقط فئة صغيرة كانت تعرف عنا.

ولكن مع مر السنين ومع الانفتاح اللي صار وكل إنجازات الأردن بقيادة المرحوم الملك حسين وبعدها جلالة سيدنا الله يطول عمره صارت الناس تعرفنا وسمعتنا ولا في واحلى منها. ومؤخراً وخاصة بعد وصول منتخبنا لكأس العالم شافت الناس انجاز النشامى على ارض الملعب ودعم وتشجيع جلالة سيدنا والعائلة الهاشمية كلها والحب المتبادل ما بين المنتخب والجماهير الأردنية العظيمة والفعاليات الحلوة مثل شباب غماس وغيرهم واللي ابهر الجميع، هذا كله ساهم ايجابياً بتعريف الاردن اكثر واكثر للمليارات اللي بتابع كأس العالم.

فالاردن عريق قدم التاريخ وبعشق ترابه وولا يمكن اقلل من مكانته او أهميته لا سمح الله وما بسمح لحدا يخون فيي او يشوه بسمعتي شكراً.