عباسي تكتب: مش دايما التوقف عن الحب معناه انه خلص او اختفى

الانسان البسيط الي بهمو الحب وانه يحب وينحب ويعيش قصة حلوة يحكيها لاحفاد احفاده بتفرق معاه الكلمة الحلوة، بتقوي وبتعطي دفعة لقدام, ممكن ترسم عوجهو ضحكة طول اليوم، ويوم بعد يوم يختلف كل اشي عم بعيشو, وحتى ردات افعالو وحتى تعاملو مع الناس حوليه.

لهيك المعارك الوهمية الي منخلقها بينا وبين الاشخاص الي منحبهم بتسرق حياتنا وبتشتت افكارنا وبتعيق خططنا، وبعد فترة رح يدركو هدول الاشخاص انهم خاضو معارك ما الها اي لازمة, وكانت كلمة حلوة منهم ممكن تقلب موازين كتيرة.

بالنهاية الحب مش كذبة, بس ببساطة الحب بدو شخصين الاول يوثق والتاني ما يخيب الظن، واتذكرو دايما انه ما في حدا كامل ، كلنا فينا عيوب بس بدرجات مختلفة, وقبل ما تنتهي اي قصة كون متاكد انك عملت كل اشي بيطلع بايدك لحتى تخلي الشخص الي بدك اياه مبسوط بعز تعبك والضغط الي عم تعيشو.

لهيك أنا اليوم ما رح احكيلكم انكم مع الوقت بتنسو او بخف الوجع، لأ!

رح احكيلكم ان شالله مع الوقت تقدرو تصنعو شخصية قوية تقدرو تخفو وراها كل خيباتكم, و تقدرو تخبو الي بتحسو في وتتذكرو ب آخر اليوم بينكم وبين حالكم ع مخدتكم بس، والتأثير يكون خفيف, وبدون تأثير على حياتكم الخارجية اجتماعياً او مهنياً, لانه قد ما كان الحرمان صعب بس للاسف الكلام ما رح يغير اشي فاولاً واخيراً تبقى المواقف اصدق الادلة.

و للحقيقة الانسان لما يحب بصدق ابداً ما رح ينسى (ما رح ينساك)، لأنو اللي بحب من قلبو مش ممكن يقدر ينسى لا بشهر ولا حتى بسنين, اللي بحب من قلبو هو نفسه الشخص الي رح يحكيلك من بعدك ما في خيارات (من بعدك ما رح اختار)