شيماء سيف تفقد 50 كيلو من وزنها (صورة)

وعن تفاصيل العملية فقالت شيماء: "عملت عملية التكميم وخدت القرار وأنا عارفة أن الناس هتزعل مني علشان أنا صاحبة مقولة ليه نعمل ريجيم وأنا قدامي شيكولاته ومكرونة بشاميل بس برضه لو نفتكر أنا كنت بطلع أقول أنا الحمد لله صحتي كويسة لو صحتي حصل فيها حاجة إلا صحتي".

وأضافت: "السنة اللي فاتت رجلي بدون سابق إنذار وجعاني علشان أنا مش بقول حاجة وأنا مثلا خبيرة وأنا بقول حالتي في الزمن اللي أنا فيه وفي تجربتي اللي أنا عيشاها ورجلي وركبتي وجعوني ولما اطلع سلمة أشعر بوجع كبير في رجلي".

وأكملت شيماء وقالت: "كلمت دكتور وكان ساعتها عندي تصوير وكلمته وقولتله الأوصاف، وقالي نعمل أشعة ولما عملتها قالي لازم حالا نعمل عملية تغيير مفصل هنا أنا حسيت أني واحدة تانية وأنا بكره أخش مستشفيات وبروح لما أكون تعبانة جدا، فإنهارت واكتئبت ويسرا شافتني وعرفت أني متضايقة ورحنا لدكتور تاني وقالي انت مش محتاجة عملية انت رجلك محملاها فوق طاقتها فالجملة جت خنجر في قلبي وخدت القرار ومي كساب فتحت ليا الباب وقعدت تقولي يلا نعمل العملية وطمنتني".

تفاصيل عملية شيماء سيف

وعن تفاصيل العملية: "رحت أعمل العملية وكانت شكة دبوس وهي الفكرة انت حابب ايه مش في العملية، هي حاجة بتساعدك وانت أول شهر مش بتاكل وبتتعود أنك مش بتاكل وبعدها نفسك بترجع تتفتح تاني بس أنا دلوقت لما تعبت ومبحبش أشوف حد بياكل وبقى عندي زهد في الدنيا وأنا عندي إرادة قوية ومش باخد وقت في القرارات والعملية مش سهلة بطنك بعدها بتوجعك".

وختمت حديثها وقالت: "أنا خسيت تدريجي بس أول فترة انت بتنزل 20 كيلو مرة واحدة وبعد كده تدريجي وكل شهر 6 كيلو وده حاجة مفرحة جدا واحساس انك تنزل من 3 أرقام لرقمين ده احساس جميل وأنا خسيت دلوقت 50 كيلو".