جودة يكتب: الزواج في زمن الواتساب

نظرة فابتسامة فسلام فرسالة واتساب فاضافة على صفحة الاصدقاء في فيسبوك فتصفح صفحة الفيسبوك والانستاجرام.. شو هالبنت الحلوة كوول والله هاي ما بتنترك . شووو هالشب شو حلووو و شو هالصحاب والصاحبات والا الرحلات اللي رايحها و هالسيارة هادا لافف الدنيا و مبين مريش والله هادا ما بينترك.. خلص .. قررت.. شو بتشتغل اكيد انت مهم .. ؟ انا اي تي في شركة بروجرامينغ انترناتيونال بيزنس . وانت .. انا انا فوتوموديل لشركة بتعمل بروموشين لسيلز عالمي. تتجوزيني ؟ طبعا انا كتير حبيتك انت سو كوول ومودرن ولافف الدنيا.. واهلك شو بقولوا ؟ موافقين اكيد انت شو بدك بس جيب اهلك وتعالوا و راح تلاقي كلشي مرتب... صارلنا شهرين متجوزين وشايفك قاعدة في البيت لاشغلة ولا عملة؟ وين الفوتوموديل و البروموشن ؟ شو كنتوا تبيعوا ؟ لما يصير عندهم دعاي لبضاعة بنادوني .. بضاعة ايش ؟ مصنعى هوة مواد غذائية كنت اتصور على اساس اني ست بيت بستعمل منتجاتهم بتعرف يعني زي علب حمص , متبل.. هيك اشيا.. وكيف كنتي تقولي عالمية؟ مهمة بصدروا لبرة كمان , مرة بعتوا على العقبة و مرة على اوروبا بعتوا عينات ما بعرف وين.. طيب وانت؟؟ وين كل الصور اللي في صفحتك عالفيس ؟ رايح باريس و روم ولندن و سيارة بالهبل , صحيح وينها السيارة؟ ولك و قديش معاشك انت ؟؟ السيارة لصاحبي تصورت فيها و باريس و روما انا بحط اني رحت هناك هو في حدا بعرف اذا رحت والا لأ .. معاشي 450 ليرة فش غيرهم.. كنت مفكر انك بتشتغلي بمعاش عالي قلت منتعاون بس هيك مش عارف كيف بدنا نعيش بمعاشي لحاله..! داق خلقي كنت فاكرة انك غني و حلو وراح تطلعني من هالفقر اللي كنت فيه طلعت كلك حكي فاضي بس مساجات و واتساب وبدي اخدك و بدي اجيبك وين تاخدني والله بمعاشك ما بنوصل سياحة عالطفيلة .. قال باريس قال .. انا راجعه عند اهلي و لما يصير معك مصاري ابعتلي مسج عالواتساب .. فكرت كتير ولقيت انه لازم نفترق عن بعض احسن, ببعتلك هاي الرسالة على واتساب و بخبرك فيها انك طالق. في جنب بيتنا صيدلية بروح دايما عندها وفيها بنت صيدلانية مش بطالة و مؤدبة و عارفة شغلها , صايرفي البلد ؟ عمو .. زمان كانت البنت تستنى فارس الاحلام يطير فيها بسيارته و ياخدها بعيد عن بيت اهلها و اهله .. طلع كله فستق فاضي وبتلاقيه اتداين عشان يتجوز و تورط ومش عارف يطلع منها هيك بيتنكد و بنكد على مرته .. صرنا نطلق واللي مش متجوزة تعلمت من غيرها , تعلمنا و صرنا نشتغل ومعاشاتنا اعلى من معاشات الشباب اللي شايفهم وبطلنا نشوفهم فرسان ولا غيره .. فمنطلع لحالنا مندخن ارجيلة ومنشرب عصير ومنلبس اللي بعجبنا و منتسلى مع بعض على ماييجي واحد اغنى واعلى مستوى معيشي من الوحدة و يكون شكله حلو ومركزه ممتاز لما تفكر تتجوز .. ايامنا غير عن ايامكم عمو... على فكرة عنك واتساب عمو ابقى اطلب مني الدوا قبل ما تيجي احضرلك اياه عشان ما تستنى كتير..اااه عندي ..فكرت بدك ياه لاشي تاني.. عمو.