جودة يكتب: المنتج المحلي .. وينه ؟!

من 30 سنة وانا نفسي البس دشداشة قطن من الناعم اللي بلمع شوي من النضافة ومن الملمس , في اوروبا ما في دشاديش , رجعت اخيرا الى الوطن وبالامس نزلت على البلد في عمان , جميلة رائعه عاصمتنا والناس في البلد طيبين و متعاونين بس الشغل فعلا قليل بسبب الظروف .. لقيت محل ملابس وعارض دشاديش قلتله شو هالدشاديش الحلوة ! في عندك على قياسي و قطن .. اجابني هادا كله قطن وهاي على قياسك (مش عارف هو ان عندي حساسية ضد البوليستر) وعلى الملمس رفعت ايدي وضحكت قلتله وحد الله يا رجل هادا كله بوليستر جاوبني انه ما فيش قطن هيك كله فسألته هادا صنع محلي قال لأ ما في صناعة محلية كله صيني بدك تروح عند خياط تفصلها !!! والله زعلت , حطيت ايدي على عيوني و فركتهم كأني بزيل عنهم غشاوة و بديت اتفرج على الفترينات بطريقة تانية اشوف وين هالبضاعة مصنوعة ... صنع الصين , صنع تركيا, صنع بنغلادش .... شو صاير لأهل البلد ؟ وين رايحين احنى؟ وين الصناعة الاردنية ؟! شو .. مش عارفين نصنع دشداشة !! والحطات و الشالات شبه الحطة الاردنية و الفلسطسنية اللي بتلف الرقبة كله بوليستر و صنع الصين .. ما لقيت ولا حطة قطن ! وين راحو ؟ يعني عشان الصين بتبيعهم بتراب المصاري و بتعطي التجار ارباح خيالية اكون السبب في خراب مصانع بلدي ؟!! وين صارت هاي هادا اللي بدهم اياه في الصين ما حدا يصنع اشي غيرهم ..ونصبح مستعمرة استهلاكية و منقول و منشتكي انه البلد فش فيها شغل ! والله عال قال جنت على نفسها براقش .. اذا كل واحد منا اشترى بقصد الرخص على حساب النوعية بتبطل المنتجات المحلية تمشي في السوق و بسكروا ..
بسطات في البلد بيبيعوا حنفيات رخيصة صيني شغالة والا مش شغالة مش مهم المهم رخيصة و مرة ناديت مواسرجي يصلح لي محبس صغير قال لي هادا ايطالي ب 3 دنانير مكفول 5 سنين و هادا تركي بدينارين مكفول سنة وهادا صيني بدينار مكفول حتى اخرج من بيتك .. عن جد .. والبسطات بتبيع العاب لاطفالنا الله يعلم كيف صانعينها و احنا عارفين انه الاطفال بتحط كلشي في تمها !! طيب من ايش مصنوعة ؟ احنا بدنا يمرض اطفالنا من اولها ؟ و بلشت انتبه لكل الصناعات المعروضة وين ماكان .. ابواب تركية .. سيارات صينية .. بدلات من بنغلادش .. احذية من كل الدول الرخيصة .. علما انه لدينا في الاردن مصنع بدلات رجالي من اجود ما يكون وانا في ايطاليا فرحت كتير لما لقيت ارماني عامل بدلات صنع في الاردن .. وبعرف انه في مصانع ابواب ممتازة اردنية .. ومصانع النسيج والبلاط و الطعام .. على فكرة الطعام في وجدت الاسواق مغرقة بأكياس مأكولات للاطفال ما عرفت شو هي .. كأنهالا بطاطا مقلية وغيرها مليئة بالمواد الحافظة والكيماوية و الزيوت الضارة بصحة اطفالنا واستغرب مين بيشتريها؟!... اعتقد ان احنا بحاجة لاعادة برمجة ...بدنا هيئة مسؤولة تشوف كل سلعة مستوردة هل يوجد مقابلها صناعة محلية بمواصفتها او اعلى؟ اذن اوقف استيراد السلعة و ساعد المصنع بالنهوض بانتاجه من ناحية المواصفات و زيادة القدرة الانتاجية ولراح اشرح ليش لاحقا. وتعمل مع هيئة حماية المستهلك و هيئة وزارة الصحة حتى لا يبقى في البلد اي سلعة تضر بالمواطن بداية بأطفالنا و نهاية بشيخوختنا. لجنة اقتصادية تتكون من القطاع العام والخاص والبنوك والدولة تقوم بدراسة اعادة تأهيل وتدريب لكل مصانع البلد بحملة ضخمة وعلى كل المستويات للنهوض بصناعاتنا من مواصفات وتاهيل عمالة محترفة وزيادة انتاج حتى نرقى بمستوى الدول المصدرة ليزداد تصديرن و دخانا القومي ونقوم بسداد ديوننا السيادية. لمن يقول بأن اليد العملة الاردنية غالية اجيبه هذا غير دقيق فلو افترضنا ان لدي مصنع ينتج الف سلعة يوميا و استطعت بيع 200 سلعة بسبب المنافسة المستوردة وبما انني اشتري الماد الخام من الخارج فعندما اشتري بالكمية المطلوبة لانتاج الالف سلعة احصل على سعر متدني اقل من السعر الذي احصل عليه لشراء كمية تكفي ل 200 .. فتزيد عندي التكلفة ولا اقبل بشراء مواد خام مختلفة رخيصة على حساب جودة مصطنعي. هذا ببساطة ولو تم اعادة برمجة لكل النواحي الصناعية والتجارية كما شرحت لوجدنا الحكومة تخفض التكاليف على الصناعات لتشجيعها و البنوك تخفف من فوائدها على المصانع المحلية واهم شيء هو (كما سيبدو غير طبيعي) رفع ايجار العامل و رفع مستوى حرفيته بتدريبه واحضار افضل المدربين الصناعيين و لدينا الكثير في الاردن منهم. رفع اجور العمال يرفع القوة الشرائية في البلد مما يعود ايجابيا على المصانع والتجار والبنوك والدولة. ولن يؤثر على اسعار السلع بل على جودتها و حسن انتاجها و مواصفاتها. مبين علي لازم استنى كمان اكم من سنة علشان البس دشداشة و حطة من صنع بلادي.. ارجو ان تكون المدة اسرع مما اتصور.