علاء الذيب عن جمال حداد.. آخر مرة حضنتك فيها عرفت انك تعبان ومش قادر

مدار الساعة - كتب: علاء الذيبمش عارف شو اكتب صارلي كم ساعة مربط، جمال حداد ماااات، القلب الطيب، الحنون، راعي الفزعة، الكريم، الزلمة الجدع، ابو الانسانية، الي مواقفه عمرها ما بتنتسى، الي كان يساعد الناس المحتاجة ، ويقول ما بدي حدا يعرف اسمي..
جمال حداد، مات بعد ما مرض كثير، والسبب خطأ طبي، من دكتور اعطاه ابرتين ما لازم يعطيه ياهم ، ودخل المستشفى مرتين، لحد ما ربنا اخذ وداعته ..
جمال حداد مؤسس وكالة الوقائع الاخبارية ، عند ربنا حقك ما راح يضيع ، وانت الي كنت توقف مع الناس لحد ما توخذ حقها ، كنت تحكي عشو نخاف بدهم الموقع يوخذوه ، كنت توقف مع الحق وما تسأل ..
جمال صحفي مهني، وبخاف ربنا بقرش الحرام، عنده علاقاته الكبيرة والكثيرة الي بسخرها عشان يساعد الناس، كثير ساعد ناس وكثير وقف مع ناس وكثير قدم للناس، وان شاء الله بتشوف الخير هذا كله وانت عند اعدل العادلين..
اخر مرة حضنتك فيها عرفت انك تعبان ومش قادر، عرفت انك حاس حالك ضعيف ومش حاب تبين، انك بتتوجع وما حدا حاس فيك، انك خايف على امك ومرتك وولادك وعلى تعب خوانك ومش قادر تحكي، انك بتفكر باليوم ١٠٠ مرة وفكره ورا فكره ومش قادر تفكر بصوت عالي.
جمال الحبيب، اليوم رحت عند ربك العادل الذي لا يظلم عنده احد ، وبكره احنا لاحقينك ، الموت حق ، والموت هو مفرق الجماعات ، بس بالحياة الاخرة ، ان شاء الله تكون من الذين يظلهم الله بظله.
الى رحمة الله يا صديقي ، الى مغفرته ورضوانه ، الى الرحيم الرحمن ، الى مالك الملك ، الى العادل المنصف ، رحمة الله عليك وغفر الله لك وتجاوز عنك ..