كلنا بنرد عبابيد

مدار الساعة - كتبت لبنى فايز بجالي، الأردنية المقيمة في ليماسول بقبرص: صاب خالي جلطة في نص الثمانينات أظن أو إنه دخل المستشفى لسبب ما.. المهم وإحنا قاعدين برى بنستنى كان في حجة لابسة مدرقة أردنية ووشم جميل مرسوم على وجهها وغليونها بإيدها .... بتسألنا إنتوا من أي عيلة جاوبتها أمي ... من عيلة شماس ... قالت شو بتردوا قالتلها عجيلات ... طبعا الحجة ما عرفت.. فجربت أمي عيلة أمها الحمارنة كمان ما عرفتهم ... جربت عيلة أبوي بجالي كمان الحجة ما عرفت .... قالت الحجة خلص يا ستي مهو بالآخر كلنا بنرد عبابيد (قصدها عشيرة العبادي).. وضلت هذي مقولة بنحكيها لليوم إنه كلنا بنرد عبابيد هذي القصة والمقولة كيف بدنا نفهمها للمستثمرين اللي بدهم يتجنسوا أردني.. كيف بدنا نفهمهم إنه كلنا بنرد عبابيد.