الوزير الهناندة يعلق على قضية الشاب أيهم

مدار الساعة - علق وزير الاقتصاد الرقمي والريادة أحمد الهناندة على قضية الشاب أيهم قندح والتي اثارت جدلا وتفاعلا على مواقع التواصل.
الهناندة قال "شكرا لكل من شاركنا وتفاعل مع قصة ولدنا ايهم ومشروعه الريادي في المفرق، سيتم لقاء ايهم يوم غد ودراسة كافة سبل دعمه ومساعدته وقريبا سيتم رفع السياسة العامة للريادة للموافقة والتي سيتم من خلالها تحفيز قطاع الرياده و دعمه لمواصلة تطوره ونموه وانجازاته التي نفتخر ونعتز بها"..
وكان الشاب ايهم نشر التالي:
يا جماعة قصتنا كالتالي.. اقرأ واستفرغ
لما بلشت مشروعي كلكو بتتذكرو كنت اشتغل على بسكليت... كل مشروعي ما كلف 150  دينار... وعشان انا بحب القانون وماشي مع القانون وعشان احس حالي صاحب مشروع رحت سجلت مشروع بالصناعة والتجارة... سألوني شو مشروعك قلتلهم خدمة توصيل... حكولي ما في بند عنا بيغطي هيك خدمة... شو رايك نسجلك (خدمات لوجستية مناولة وامداد وتخزين ونقل)... اسم طويل عريض ما الو دخل بشغلي... قلنا ماشي... سجلنا ورخصنا وبلشنا شغل.
والحمد لله بتتذكرو كم موقع وكم جريدة وكم محطة حكو عني وعن مشروعي... شاب يرفض ثقافة العيب ويبدأ مشروع... توصيلة على بسكليت... ايهم قندح الخ الخ الخ...
ومشروعي اخذ كذا جائزة كمشروع ريادي ابداعي.... سيدي ومولاي جلالة الملك التقاني وشد على ايدي وشجعني.. كل هاد كان يقوي عزيمتي وبلشنا نكبر شوي شوي وصرنا كم شب بيحاول يشتغل ويطلع مصروفو واشي بيدرس وبيشتغل واشي بيصرف على امو المريضة..... ونقول الحمد لله عل كل شي.
.. فش بعد كم شهر بترن علي اشي اسمو هيئة تنظيم قطاع الاتصالات... قال مشروعك بدو ترخيص من عنا... رسوم سنوية 1200 دينار... ول ليش؟؟؟ قال انت بتشتغل زي خدمة البريد... ولكو يا عمي بريد شو... انا شغال اوصل سندويشة شاورما...  شوية خضرة... طير جاج... علبة دوا.... قالوا وقف وقف وقف ممنوع توصل اكل ولا دوا هاي الشغلة بدها كمان ترخيص من الغذاء والدواء... لا وشو بتدخل على تعليمات البريد قال بدك وصل استلام وتسليم لكل ساندويش شاورما وتواقيع واحتفاظ بسجلات وتزويد الهيئة بتقارير وقصص الها اول ما الها اخر... عشان شو مش فاهم.
رجعنا دخلنا على اشي اسمو الموافقات المسبقة على موقع وزارة الصناعة والتجارة... ما لقينا انو بدها موافقات مسبقة.
طيب هو احنا بنضرب بالرمل يعني... انا لو بعرف هيك مشروعي هلقد مهم وخطير كان ما بلشت في اصلا. شو 1200 دينار بالسنة متخيل انت طلب بوخد عليه نص دينار بدي كل يوم 7 طلبات عشان بس رسوم ترخيص الهيئة... هاد بدون إبجار ولا مصاريف ولا شي لسا
رجعنا نراجع ونعترض لا حياة لمن تنادي او على قول جدتي لا حياة لمنتولاتو (اللي لحق المنتولاتو بيعرف شو هو) بعثنا فاكسات ايميلات شكاوى من عند رئاسة الوزراء ونازل وما حد حكا معانا ولا فهمنا شو القصة.
اليوم يا سادة يا كرام بترن علي الهيئة وبتخبرني انو علي رسوم ترخيص ثلاث او اربع او خمس سنوات... المبلغ 10 الاف دينار غير الغرامات... وحكولي احنا عارفين عن كل الشركات الثانية والدور جاي عليكو واحد واحد... احنا جايين الاحد نسكر مؤسستك بالشمع الاحمر........
بدكو شباب يشتغل حكيتولي.؟ .. بدكو مشاريع رائدة؟ .... بدكو الشباب يصرف على حالو؟ بدكو نظل نحب هالبلد؟ بدكو ننظر بعين الامل للمستقبل؟ بدكو نبتعد عن المخدرات والابصر شو؟ بالله عليكو... بالله عليكو احنا شباب شغالين على مستوى دينار وايام ما بنطلع مصروفنا ما انتو شايفين وعارفين... بنشتغل بعز الشوب..  بنشتغل بعز المطر والبرد... معقول الله قالها ندفع 1200 نيرة لهيئة مش عارفين شو دورها بالموضوع.... اذا التعليمات والقوانين هاي انحطت قبل ما يكون في اشي اسمو خدمة توصيل... يا عالم عدلو التعليمات... عدلو الانظمة... خليكو متابعين للتطور.. ما انتو هيئة اسمكو لحالو بيخوف.... واللا اذا ما اخذتو منا 1200 دينار رواتبكو بتتأثر؟
المهم يا سادة يا كرام اذا تسكر مشروعي انا اعلن وبكل بساطة اني رح اقعد اشحد ورح ابعثلكو لوكيشن وين بكون اشحد وخلي فرقة مكافحة التسول يعتقلوني بس مش يطلعو يقولو عندو سكوتر باسمو وسجل تجاري.. ترا انا من وراهن رح اصير اشحد مش من ورا شي تاني.
حد يحكي مع قتيبه ياخدني معو ... مشان الله هجرة ... بديش اضل ثانية بالبلد
بحكي وببكي من وجعي صدقوني
صاحب اول مشروع توصيل فيكي يا مفرق
وكان عضو لجنة الاصلاح الملكية زيد النابلسي وجه نداء عبر صفحته على الفيسبوك قال فيه "نداء إلى جميع أركان هذه الدولة، إلى من يريد إصلاح هذا البلد، هنا يكمن الخلل وهنا أصل الداء وسبب البلاء… لا تتركوا أيهم وحيداً، فالقطاع العام المتضخم الذي أغرقنا بالديون لدفع رواتبه أصبح هو صميم المشكلة وهو الذي سيجرنا معه إلى الهاوية"…