حتى تصبح «مملكة الجبل الأصفر» دولة عربية

أغلبكم سمع عن (مملكة الجبل الأصفر) على الحدود المصرية السودانية والتي أعلنتها اللبنانية (نادرة ناصيف) والتي نصّبت نفسها رئيسة للوزراء (هيك طب خبط لزق) ..لن أدخل بالاسباب و بنظريات المؤامرة لأن المتابعين لها اشبعوها تلحيماً و شكشكة..! ما يهمني هو السؤال الذي وجهته لـ ((الأرفل)) : كيف يمكن لمملكة الجبل الأصفر أن تصبح دولة عربية عن حق وحقيق؟؟ وما أن سمع الأرفل سؤالي حتى جرّني من يدي بعصبية شديدة و أدخلني للحمّام وأغلق عليّ الباب وأنا أطبّل وأزمجر وهو يصرخ ويقول:-

دولة عربية؟؟ ولك مش عارف ما هي شروط تكوين بعض الدول العربية ..؟ ولك العنمة عارفة..الصوص عارف..القمل إللي في راسك بيعرف..الصرصور اللي مارق يصفّر عارف..ولك هو حدا في العالم مش عارف..؟! وأنا من الداخل أصرخ : والله مش عارف؛ مش عارف..عرّفني..

حكالي: بسيطة ..رح أصدّق انك مش عارف..عشان تكون دولة مثل بعض الدول العربية .. لازمك شوية قوانين تمط و تفطّ وفصّل والبس..مقدور عليهن !! لازمك شوية محسوبيات وشلليات..مقدور عليهن ! لازم شوية سجون وشوية طوابير للفقراء..

وشوية سكّرْ فمك..وشوية اعرف مع مين تحكي..وشوية والله لأورجيك..وشوية غش بالامتحانات والتعيينات و الترفيعات..وشوية من كل شي شايفه اليوم بعيونك..وكله مقدور عليه..! وبعدها يا صاحبي روح وبرطع فلقد صار عندك دولة عربية..!

صرخت به وأنا أخبط على الباب: خلص فهمت..افتح باب الحمّام طيّب..قال لي الأرفل وهو يضحك: هذا بعدك..ما بفتحلك حتى ينتخب شعب مملكة الجبل الأصفر أول مجلس نواب له..ويصوّتوا عليك : أفتحلك وإلاّ ما أفتحلك..!(الدستور)