“خليك من جوّه”

ما زال يتّخذه مبدأً ثابتاً في الحياة بعد ان اعتاد عليه منذ بداية الوعي ، فمثلاً لم يكن يرضى أن تضع أمه “فرشته” في الوسط أول الغرفة أيام الشتاء، بل كان يختار الزاوية الشرقية الشمالية من البيت ، حيث لا ريح بارد يتسلل من أسفل الباب ولا دلف رطب ينزل على رأسه من أوسط السقف ، وكلّما حاولوا تغيير مكانه كان يرفض قائلاً : “خليني من جوه” .
عند حضور السرفيس أمام الطابور ، كان يرسم الركاب أين سيجلسون متجنبين الكرسي الأوسط ، بينما كان هو يحاول إقناع الشريكين في الكرسي الخلفي قائلاً: “خليني من جوه أحسن” لأني آخر واحد نازل..وبهذا المكان الاستراتيجي يبقى خلف السائق مباشرة ويرتاح من قصة الصعود والنزول على الطريق وفي حال حوادث السير لا سمح الله “يكون من جوّه”..
بناء على هذا المبدأ الثابت ، طلب أبو يحيى من شلاش أن يتصل بــ” عرنوسة” ابن خالته “نوفه” ذاك الشاب المحامي ليحضر فوراً إلى بيتهم بأمر هام: “قلّه جوز خالتك بده إياك بسعّ..وخله يجيب معه وكالة وقانون العقوبات”..
حضر الشاب عادل الملقّب بــ”عرنوسة” مرتدياً بيجامته الرمادية وبيده ملفّ بلاستيكي مقوى فيه أوراق ثم جلس في المضافة لا يدري لماذا طلب وفيما استدعي..
“أبو يحيى” أمر شلاش بصب القهوة ثم التفت إلى الشاب ابن عديله المرتبك وقال له :
( مسّيك بالخير خالي..ما تخاف فيش أشي يخوّف..أني حبّيت استشيرك بشغلة قانونية) ..الشاب وهو يبلع ريقه: تفضّل خالي …أبو يحيى وهو يحك شعره : ( يزيد فضلك..هسع بتعرف يا خالي ..إني بحبّ “أكون من جوه” طول عمري..يعني بحبّش حدا يضحك علي..وبحبّ أكون قاضب الناس مش الناس قاضبيتني..فهمت علي..كونك محامي وبتفهم بالقانون..مبارح قريت انه السجين بيكلف الدولة 700 دينار صحيح هالحكي؟؟) ..”عرنوسة”:هيك بيقولوا خالي..أبو يحيى: ( ما علينا..نفترض هالحكي صحيح خالي ..أني تقاعدي 300ليرة ماشي..وقسط عايش بالجامعة بالفصل 900 دينار يعني بالشهر 300 وظل عليه 3 سنين تا يخلص..يعني اللي بنوخذهن من هون بنحطهن هون..ماشي؟ )..
• المحامي عادل بصوت منخفض :ماشي..
• أبو يحيى: ( ولأني بحب اكون من جوه..هسّع قول مثلاً اذا “فتت السجن” قديش بخسّر الدولة 700 ليرة صح؟؟..شيل منه قسط عايش”300″ اللي بدفعلهم إياهن..بظل 400، شيل منه “300” راتب التقاعد اللي بدفعوا لي اياه..قديش بظل مخسّرهم..؟؟
• المحامي عادل: بقلوب بعضه 100 دينار..
• أبو يحيى: شيل 50 ليرة بدل دعم الخبز إذا صار..
• عرنوسة: بيظل 50 دينار..

أيوه الله ينوّر عليك ، هظول ربحي من الحكومة شهرياً إذا انحبست عندهم ..يعني فرق التوفير وطالعت أكلي وشربي و بدل قسط الولد اللي بالجامعة..هيك بكون “اني من جوه” والحكومة من بره..
• المحامي عادل: بس خالي أنا شو المطلوب مني؟؟
• أبو يحيى: بدي إياك تشوفلي قانون العقوبات..تستطري لي جريمة عقوبتها ثلاث سنين .. ثلاث ونص..بيكون الولد تخرّج ..واني استدّيت اللي بدفعه للحكومة و”أني جوّه”!
الرأي